STOP isegwi ġerarkija ta’ kontroll. Għal karċinoġeni, pass ‘l isfel fil-ġerarkija huwa permess biss meta l-limitazzjonijiet tekniċi jipprevjenuk milli telimina l-espożizzjoni għalkollox. Hawnhekk se niffukaw fuq P għall-protezzjoni personali. Jekk jogħġbok ikkunsidra S, T u O qabel P. Innota wkoll li tista’ tintuża taħlita ta’ miżuri.

Xi kultant is-sostituzzjoni ma tkunx possibbli u l-miżuri tekniċi u organizzattivi ma jkunux biżżejjed biex inaqqsu l-livelli ta’ espożizzjoni. Imbagħad ikollok bżonn tuża protezzjoni personali. It-tagħmir protettiv personali (PPE) jgħin biex iżomm il-karċinoġeni ‘l bogħod mill-pulmuni, il-ġilda u l-għajnejn. Il-PPE jista’ jintuża biss bħala suppliment għal miżuri ogħla fil-ġerarkija u jitqies bħala l-aħħar għażla.

Il-PPE huwa kwalunkwe tagħmir iddisinjat u manifatturat biex jintlibes jew jinżamm minn persuna għall-protezzjoni kontra riskju wieħed jew aktar għas-saħħa jew is-sigurtà ta’ dik il-persuna.

X’għandu jiġi kkunsidrat meta tagħżel il-PPE:

• Il-proprjetajiet perikolużi tal-karċinoġeni preżenti fuq il-post tax-xogħol
• L-informazzjoni dwar il-PPE disponibbli fuq skedi ta’ dejta dwar is-sigurtà
• Ir-riżultati tal-evalwazzjoni tar-riskju fuq il-post tax-xogħol
• Il-karatteristiċi individwali tal-ħaddiem, eż. it-tul tal-ġisem, id-daqs taż-żarbun

L-użu tal-PPE xieraq għall-karċinoġeni preżenti fuq il-post tax-xogħol huwa essenzjali. Żomm f’moħħok li ħafna drabi jkun meħtieġ aktar minn PPE wieħed.

L-għażla tal-PPE xieraq

Linji gwida bażiċi

Min iħaddem għandu jiggarantixxi li l-PPE huwa adattat biex inaqqas ir-riskji relatati max-xogħol involuti, filwaqt li jqis in-natura, il-frekwenza u t-tul ta’ żmien tal-espożizzjoni. Meta jagħmlu dan, jeħtieġ li jikkunsidraw il-fattur ta’ protezzjoni adegwat u ż-żieda potenzjali f’riskji oħra relatati max-xogħol.

Il-PPE għandu joqgħod sew mal-utent maħsub sabiex ikun effettiv (kun konxju li x-xagħar tal-wiċċ jista’ jikkomprometti l-qagħda u l-funzjoni xierqa). L-ergonomija u l-allerġiji tal-ħaddiema (eż. latex) għandhom jitqiesu wkoll. Barra minn hekk, trid tikkunsidra taħt liema kundizzjonijiet se jintużaw, sabiex tiddeċiedi skont dan.

Kun żgur li tinvolvi lill-ħaddiema tiegħek meta tagħżel l-aktar PPE adegwat. PPE komdu u mwaħħal sew jagħmilha aktar faċli għall-ħaddiema biex jużawh.

Il-PPE jeħtieġ li jkollu l-marka CE biex jindika li huwa konformi mal-leġiżlazzjoni tal-UE.

Min iħaddem jeħtieġ li jiżgura li l-ħaddiema jkunu konxji ta’ liema protezzjoni personali jeħtieġu jużaw f’kull wieħed mill-kompiti tagħhom, u kif jużawha kif suppost.

Tindif, ħażna u manutenzjoni

F’żoni tax-xogħol fejn huwa meħtieġ l-użu tal-PPE trid tiżgura li:

• Hemm postijiet separati għall-ħażna għall-ħwejjeġ tax-xogħol jew protettivi u għall-ħwejjeġ tat-triq.
• It-tagħmir protettiv għandu jiġi ċċekkjat u mnaddaf wara kull użu u maħżun kif suppost f’post definit sew.
• Tagħmir difettuż jissewwa jew jinbidel qabel ma jerġa’ jintuża
• Jekk il-PPE se jerġa’ jintuża, għandu jkun faċli biex jitnaddaf u/jew jiġi diżinfettat.

Il-politiki interni għandhom jistabbilixxu l-proċeduri li l-ħaddiema jridu jikkonformaw magħhom rigward it-tagħmir protettiv li jeħtieġu, jiġifieri dwar kif jużawh, inaddfuh, iżommuh u jaħżnuh b’mod korrett.

Speċifika l-PPE

Ir-riżultati tal-evalwazzjoni tar-riskju fuq il-post tax-xogħol u l-istruzzjonijiet tal-ħaddiema jeħtieġ li jiddikjaraw b’mod ċar liema PPE għandu jintuża mill-ħaddiema għal kull kompitu, li jfisser li jindika b’mod ċar il-livell ta’ protezzjoni ta’ kull PPE u l-ispeċifikazzjonijiet tekniċi tagħhom. Mhuwiex biżżejjed li jissemma vagament li pereżempju l-ingwanti għandhom jintużaw f’kompitu partikolari, jeħtieġ li jissemma t-tip ta’ ingwanta li għandha tintuża.

Pariri prattiċi

• Kun żgur li l-PPE li jintuża darba biss ma jerġax jintuża
• Żomm it-tipi differenti ta’ PPE (ingwanti, maskri, eċċ.) għall-minimu biex iżżid il-konformità – tista’ tintuża sistema kkodifikata bil-kulur
• Kun żgur li l-PPE jaqbel sew mad-daqs ta’ kull ħaddiem – PPE maħlul jista’ jżid ir-riskju ta’ espożizzjoni u inċidenti, eż. jekk ikun hemm partijiet li jduru fil-makkinarju
• Il-ħidma bil-PPE (eż. protezzjoni respiratorja) tista’ tkun impenjattiva u stressanti għall-ħaddiema – ikkunsidra soluzzjonijiet differenti meta tagħżel il-PPE xieraq (eż. l-użu ta’ respiratur li jippurifika l-arja bil-mutur minflok maskri bil-filtru)
• Il-kompożizzjoni tal-materjal u l-piż tal-PPE għandhom jitqiesu wkoll matul il-proċess tal-għażla (eż. ippreferi fibri naturali, evita stivali tax-xogħol tqal)
• Meta tneħħi l-PPE segwi l-proċeduri xierqa biex tevita l-kontaminazzjoni – jiġifieri kif tneħħih b’mod korrett, f’liema ordni u kif taħżinh (eż. neħħi l-ħwejjeġ protettivi qabel ma tneħħi t-tagħmir respiratorju protettiv (RPE), aħżen l-RPE ‘l fuq mill-ħwejjeġ u bil-ftuħ iħares ‘l isfel).
• B’mod ġenerali, il-PPE m’għandux jittieħed id-dar – kun konxju li l-PPE kkontaminat (eż. ħwejjeġ, stivali) jista’ potenzjalment jagħmel ħsara lill-membri tal-familja tiegħek
• L-ispiża finali tal-PPE tinkludi mhux biss il-prezz tax-xiri, iżda wkoll in-numru ta’ drabi li jkun jeħtieġ li jiġi mibdul.
• Ikkunsidra li tilbes ingwanti tal-qoton taħt ingwanti protettivi biex tnaqqas it-traspirazzjoni, jekk meħtieġ
• U ftakar, daqs wieħed mhux tajjeb għall-ħaddiema kollha!