Il-Kontroll tas-Sustanzi Perikolużi tal-GDA huwa servizz disponibbli għall-partijiet kollha involuti fis-saħħa u s-sigurtà fuq il-post tax-xogħol fi ħdan kumpanija. L-għan tiegħu huwa li jgħin fl-antiċipazzjoni b’mod veloċi tal-perikli għall-impjegati ppreżentati minn karċinoġeni u fit-teħid ta’ miżuri ta’ protezzjoni effettivi. Ġie żviluppat mill-awtoritajiet federali u reġjonali Ġermaniżi u l-Istituzzjonijiet Ġermaniżi tal-Assigurazzjoni Soċjali kontra l-Inċidenti taħt l-awspiċi ta’ dawn tal-aħħar u l-istituti tagħhom, l-IFA u l-IPA, fil-kuntest tal-programm ta’ ħidma intitolat ‘Immaniġġjar Sikur ta’ Sustanzi Karċinoġeniċi’, stabbilit mill-Istrateġija Konġunta Ġermaniża għas-Sigurtà u s-Saħħa fuq il-Post tax-Xogħol (GDA).
Kontenut u miri
Il-Kontroll tas-Sustanzi Perikolużi tal-GDA joffri disa’ komponenti, strutturati skont is-suġġett, li jsegwu l-passi tal-valutazzjoni tar-riskju u huma maħsuba biex jgħinu fl-implimentazzjoni, it-tlestija, it-titjib u l-aġġornament pass pass tagħha:
- Introduzzjoni
- Ġbir ta’ informazzjoni
- Espożizzjoni
- Livell ta’ espożizzjoni
- Miżuri protettivi
- Istruzzjoni/Istruzzjonijiet operattivi
- Kura tas-saħħa preventiva/professjonisti tas-saħħa u s-sigurtà fuq il-post tax-xogħol
- Reġistru tal-espożizzjoni
- Dokumentazzjoni
Kull komponent jinkludi minn tlieta sa ħames mistoqsijiet li jiffokaw fuq l-aspetti differenti tal-komponent ikkonċernat. L-utent jista’ jwieġeb il-mistoqsijiet billi jagħżel mill-għażliet li ġejjin, li huma bbażati fuq il-mudell tat-traffiku: aħdar għal “rekwiżiti sodisfatti”, isfar għal “rekwiżiti parzjalment sodisfatti” u aħmar għal “rekwiżiti mhux sodisfatti”. Dan jippermetti evalwazzjoni mill-utent innifsu bbażata fuq l-informazzjoni pprovduta, li min-naħa tagħha tgħin fid-determinazzjoni ta’ miżuri biex tittejjeb is-saħħa u s-sigurtà fuq il-post tax-xogħol.
Verżjonijiet
Il-Kontroll tas-Sustanzi Perikolużi tal-GDA huwa disponibbli fil-forma ta’ għodda online komprensiva u wkoll f’forma kompatta bħala fuljett stampat jew fajl PDF. Bħalissa, l-għodda online hija disponibbli biss bil-Ġermaniż. Il-forma bħala fuljett PDF hija disponibbli bl-Ingliż. Iż-żewġ verżjonijiet fihom id-disa’ komponenti kollha u l-mistoqsijiet korrispondenti.
Onlajn
Il-verżjoni komprensiva tal-Kontroll tas-Sustanzi Perikolużi tal-GDA tista’ tiġi aċċessata fuq il- websajt tal-Kontroll tas-Sustanzi Perikolużi . Din tipprovdi lill-utent b’funzjonijiet addizzjonali:
- Issejvjar sigur tar-riżultati fuq il-kompjuter tal-utent stess.
- Ħarsa ġenerali lejn ir-riżultati u rapport finali biex jgħin fid-determinazzjoni tal-kompiti u l-miżuri.
- Glossarju estensiv li jispjega termini tekniċi.
Barra minn hekk, għal kull mistoqsija li ssir fil-komponenti, il-verżjoni online tipprovdi spjegazzjonijiet dettaljati taħt l-intestatura ‘Xi jfisser dan?’ tar-rekwiżiti transsettorjali li jirriżultaw mill-Ordinanza dwar Sustanzi Perikolużi (Gefahrstoffverordnung).
Eżempji ta’ miżuri ta’ protezzjoni speċifiċi għal ċerti kompiti, proċeduri jew fergħat tal-industrija huma pprovduti taħt l-intestatura: ‘X’għandu jsir?’. Dan jinkludi informazzjoni dwar meta għandha tiġi kkuntattjata l-awtorità tal-istat dwar l-OSH.
Il-verżjoni online tipprovdi wkoll links għal aktar informazzjoni u gwidi prattiċi u utli għal kważi l-fergħat kollha tal-industrija taħt it-titlu ‘Għajnuniet prattiċi’ li jinsabu f’kull mistoqsija.
Stampa u PDF
Fil-verżjoni stampata, kull mistoqsija hija spjegata b’test qasir u f’ħafna każijiet b’immaġnijiet ta’ eżempju. Il-browxer fih ukoll għażla tal-aktar termini tekniċi importanti meħuda mill-glossarju online. Il-browxer huwa disponibbli fuq il- websajt tal-Hazardous Substance Check .
Aktar informazzjoni
Għal aktar informazzjoni jekk jogħġbok ikkuntattjana billi tibgħat email lil: gda-gefahrstoff-check@bgrci.de
