“Strādā vesels”, l-organizzazzjoni Latvjana għas-saħħa u s-sigurtà fuq il-post tax-xogħol, żviluppat awtotestijiet għall-impjegati biex jittestjaw l-għarfien tagħhom dwar l-asbestos, it-trab u l-karċinoġeni b’mod ġenerali, sabiex iqajmu kuxjenza dwar ir-riskji tal-karċinoġeni fuq il-post tax-xogħol.

L-ambjent u l-problema

Nies li jaħdmu fil-kostruzzjoni, fil-manifattura u f’ħafna setturi oħra jaħdmu kuljum ma’ karċinoġeni, asbestos u trab. Madankollu, ħafna drabi mhumiex konxji għalkollox ta’ x’jinvolvi x-xogħol b’dawn is-sustanzi. M’għandhomx għarfien dwar liema sustanzi huma perikolużi, dwar kif jaħdmu magħhom u dwar il-kwistjonijiet tas-saħħa li għalihom tista’ twassal l-espożizzjoni. Minħabba dan, xi kultant ma jittieħdux miżuri ta’ prekawzjoni jew ma jittieħdux bis-serjetà u l-livelli ta’ espożizzjoni huma ogħla milli meħtieġ.

Soluzzjoni

Sabiex titqajjem kuxjenza, l-organizzazzjoni Latvjana għas-saħħa u s-sigurtà fuq il-post tax-xogħol, Strādā vesels, żviluppat awtotestijiet għall-impjegati biex jittestjaw l-għarfien tagħhom dwar il-ħidma ma’ karċinoġeni, l-asbestos u t-trab. Għal kull mistoqsija, tiġi pprovduta informazzjoni addizzjonali sabiex in-nies ikunu jistgħu jżidu l-għarfien tagħhom. Il-qari ta’ din l-informazzjoni huwa stimulat, għaliex il-punteġġi tal-individwi jitqabblu mal-medja Latvjana. Dawn l-awtotestijiet interattivi huma mod sabiħ biex titqajjem kuxjenza fost l-impjegati dwar il-ħidma ma’ karċinoġeni.