Min iħaddem spiss ikun motivat biex jimminimizza l-espożizzjoni tal-impjegati tiegħu għal sustanzi perikolużi, iżda spiss ma jkunx jaf minn fejn jibda. Għalhekk, l-Ispettorat tax-Xogħol Olandiż żviluppa għodda ta’ evalwazzjoni għal min iħaddem biex jivverifika jekk il-kumpanija tagħhom taħdimx b’mod sikur u san b’sustanzi perikolużi u biex jiffaċilita azzjonijiet ta’ segwitu. L-għodda bħalissa hija disponibbli biss bl-Olandiż.

L-ambjent u l-problema

Min iħaddem għandu jiżgura li l-livell ta’ espożizzjoni tal-impjegati għal sustanzi perikolużi, li minnhom sustanzi karċinoġeniċi u mutaġeniċi jiffurmaw sottogrupp, ikun taħt ċertu limitu. Idealment, l-espożizzjoni għandha tkun baxxa kemm jista’ jkun biex tiġi minimizzata l-inċidenza ta’ kanċer relatat max-xogħol. Madankollu, problema li jesperjenzaw il-kumpaniji hija li ma jafux x’għandhom jagħmlu. Minn fejn wieħed jibda?

Soluzzjoni

Punt ta’ tluq tajjeb huwa l-għodda ta’ awtoevalwazzjoni għax-xogħol b’sustanzi perikolużi. Din l-għodda tiggwida lill-impjegaturi fil-proċess ta’ awtoevalwazzjoni u hija faċli biex tintuża. Tgħaddi mill-proċess pass pass u tindika liema punti ta’ azzjoni kumpanija teħtieġ li twettaq. Barra minn hekk, tipprovdi links utli f’kull pass, pereżempju għal listi b’sustanzi karċinoġeniċi, mutaġeniċi jew riprotossiċi jew għal websajts fejn jiġu spjegati l-valuri limitu. L-Ispettorat m’għandux aċċess għall-informazzjoni pprovduta mill-utenti. Din l-għodda tagħmilha possibbli għall-impjegaturi li jivverifikaw u jtejbu faċilment il-mod kif qed jaħdmu b’sustanzi perikolużi u li jikkontribwixxu għal ambjent tax-xogħol sikur u b’saħħtu.

Riżultati

• Minimu ta’ 25% tal-kumpaniji li jaħdmu b’sustanzi perikolużi huma familjari mal-għodda ta’ awtoevalwazzjoni u jużawha ta’ spiss.
• L-aħjar prattiki huma ppubblikati mill-ispettorat tax-xogħol fuq www.inspectiefocus.nl

Lezzjonijiet miksuba

• Din l-għodda ċċarat l-azzjonijiet ta’ segwitu tal-kumpaniji sabiex jaħdmu b’mod sikur ma’ sustanzi perikolużi. Turi x’għandu jsir, mhux kif.
• Huwa meħtieġ allinjament fost il-kumpaniji, l-organizzazzjonijiet tas-settur u l-ispezzjoni tax-xogħol dwar sustanzi perikolużi. Dan jista’ jintlaħaq permezz ta’ djalogu fost il-partijiet interessati differenti.
• Il-metodoloġija tal-awtospezzjoni hija kumplessa wisq għal intrapriżi żgħar, u dan jagħmel il-prattiki tajbin aktar siewja għal dan il-grupp fil-mira.