NEPSI huwa l-akronimu għan-‘Netwerk Ewropew għas-Silika’ ffurmat mill-assoċjazzjonijiet settorjali Ewropej tal-Impjegati u tal-Impjegaturi. Huma ffirmaw il-‘Ftehim ta’ Djalogu Soċjali dwar il-Protezzjoni tas-Saħħa tal-Ħaddiema Permezz tal-Immaniġġjar u l-Użu Tajjeb tas-Silika Kristallina u Prodotti li Fihomha’ fil- 25 ta’ April 2006. NEPSI jirrappreżenta 18-il settur industrijali li jinkludu aktar minn żewġ miljun impjegat u negozju li jaqbeż il-250 biljun ewro.
Problema
Is-silika kristallina hija komponent essenzjali tal-materjali li jintuża f’ħafna prodotti u oġġetti li nużaw kuljum. Pereżempju, huwa diffiċli li timmaġina djar mingħajr briks, jew karozzi mingħajr magni, jew bliet mingħajr toroq. Għalkemm is-silika kristallina tista’ tinstab f’diversi forom kullimkien, l-inalazzjoni tat-trab fin tagħha tista’ tikkostitwixxi periklu fuq il-post tax-xogħol. Meta wieħed iqis il-possibbiltà li jikkontrolla tali espożizzjoni, l-industriji kkonċernati bl-espożizzjonijiet għas-silika kristallina respirabbli qablu dwar miżuri xierqa u kredibbli għat-titjib tal-kundizzjonijiet tax-xogħol.
Soluzzjoni
L-organizzazzjonijiet tas-settur tal-industrija NEPSI u l-federazzjonijiet tat-trade unions kontropartijiet tagħhom żviluppaw gwida ta’ prattika tajba. Għamlu dan flimkien ma’ esperti minn istituti nazzjonali tas-saħħa mir-Renju Unit, il-Ġermanja u Spanja. Il-gwida ta’ prattika tajba tikkonsisti f’żewġ partijiet. L-ewwel parti tagħti informazzjoni essenzjali dwar is-silika kristallina respirabbli, it-tieni parti fiha firxa ta’ gwida tal-kompiti li tiddeskrivi tekniki ta’ prattika tajba għal diversi kompiti komuni u speċifiċi. Il-folji ta’ gwida ġenerali japplikaw għall-industriji kollha li huma firmatarji tal-Ftehim dwar il-Protezzjoni tas-Saħħa tal-Ħaddiema permezz tal-Immaniġġjar u l-Użu Tajjeb tas-Silika Kristallina u Prodotti li fihomha. Il-folji tal-kompiti speċifiċi jirrelataw għal kompiti li jikkonċernaw biss numru limitat ta’ setturi tal-industrija.
Minbarra l-gwida ta’ prattika tajba, ġew żviluppati vidjows tal-PIMEX biex juru l-effettività tal-prattiki tajbin tal-NEPSI fit-tnaqqis tal-esponiment relatata max-xogħol għat-trab.
Riżultat
L-għan tal-gwida u l-vidjows tal-PIMEX huwa li jagħtu lill-produtturi u lill-utenti ta’ prodotti u materjali li fihom silika kristallina gwida dwar l-applikazzjoni prattika ta’ programm għall-immaniġġjar tas-silika kristallina respirabbli u gwida dwar l-użu sikur ta’ prodotti li fihom silika kristallina fil-post tax-xogħol.
Il-Ftehim NEPSI għandu l-għan li
- il-ħarsien tas-saħħa tal-Impjegati
- minimizzazzjoni tal-espożizzjoni għas-Silika Kristallina Respirabbli billi jiġu applikati l-Prattiċi Tajbin
- iż-żieda fl-għarfien dwar l-effetti potenzjali fuq is-saħħa tal-RCS u dwar Prattiki Tajbin
- Impenn settorjali biex jiġu implimentati u rrappurtati l-KPIs: kull settur firmatarju jipprovdi kull sentejn serje ta’ indikaturi dwar l-applikazzjoni tagħhom tal-Ftehim, ara http://www.nepsi.eu/reporting
