Madwar 1.6 miljun ruħ fl-età tax-xogħol jiġu djanjostikati bil-kanċer fl-Ewropa kull sena. Bis-saħħa tal-avvanzi mediċi, l-għadd ta’ dawk li baqgħu ħajjin wara l-kanċer qed jiżdied u aktar pazjenti li fiequ jirritornaw għax-xogħol.
L-Aġenzija Ewropea għas-Sigurtà u s-Saħħa fuq il-Post tax-Xogħol (EU-OSHA, wieħed mis-sitt imsieħba), tipprovdi ħarsa ġenerali lejn dak li hu magħruf dwar din il-kwistjoni emerġenti bbażata fuq il-letteratura xjentifika. It-telf ekonomiku totali għall-Unjoni Ewropea minħabba jiem ta’ xogħol mitlufa b’riżultat tal-kanċer kien stmat għal 9.5 biljun ewro fl-2009. Madankollu, għalkemm ir-ritorn għax-xogħol ta’ dawk li jsalvaw mill-kanċer huwa ekonomikament importanti, ftit li xejn huwa rrappurtat dwar l-ispiża tal-falliment. Ħafna nies li jsalvaw mill-marda jsibuha diffiċli biex jirritornaw għax-xogħol iżda dan il-proċess mhux dejjem ikun faċli u jistgħu jiffaċċjaw diffikultajiet.
Kwistjonijiet dwar ir-ritorn għax-xogħol
Ir-riċerka turi li l-ħaddiema affettwati mill-kanċer jirrappurtaw diversi effetti tal-marda u t-trattament tagħha fuq saħħithom, inklużi sintomi mentali, konjittivi u fiżiċi. L-għeja, l-eżawriment u t-tensjoni emozzjonali huma l-aktar konsegwenzi komuni, irrispettivament mit-tip ta’ kanċer. Implikazzjonijiet oħra tal-kanċer jistgħu jkunu dipressjoni, ansjetà, uġigħ u problemi bl-attenzjoni u l-memorja. Bħala riżultat ta’ wieħed jew aktar minn dawn is-sintomi, il-produttività tax-xogħol u l-kapaċità tagħhom għax-xogħol jistgħu jiġu mminati, u dan jagħmilha aktar diffiċli biex jibqgħu fis-suq tax-xogħol jew jerġgħu jidħlu fih, u dawk li jsalvaw mill-kanċer jistgħu ma jkunux jistgħu jwettqu l-kompiti tas-soltu tagħhom. Fatturi oħra li jinfluwenzaw ir-ritorn għax-xogħol wara t-trattament tal-kanċer huma t-tifsira tax-xogħol u l-motivazzjoni għax-xogħol, u l-attitudnijiet u l-imġieba tal-kollegi jew ta’ min iħaddimhom. Esperjenzi negattivi bħal li tħossok stigmatizzat jew diskriminat jew adattamenti mhux mitluba fuq il-post tax-xogħol ifixklu r-ritorn.
L-indirizzar ta’ dawn il-fatturi kollha jista’ jtejjeb ir-rati ta’ ritorn għax-xogħol u jindika ħaddiema li huma speċifikament f’riskju li ma jirritornawx għax-xogħol. B’mod ġenerali, l-akkomodazzjonijiet tax-xogħol ipprovduti minn min iħaddem u l-appoġġ għar-ritorn għax-xogħol minn professjonisti tal-kura tas-saħħa huma apprezzati mis-superstiti tal-kanċer, sakemm ikunu miftiehma u kkonsultati mal-ħaddiema. Madankollu, għalkemm programmi bħal dawn huma disponibbli f’għadd ta’ pajjiżi, jidher li hemm nuqqas ta’ għarfien dwarhom u dwar x’jista’ jsir biex is-superstiti tal-kanċer jinżammu fuq il-post tax-xogħol.
Skont ir-rapport tal-EU-OSHA, id-daqs tal-kumpanija jidher li għandu impatt fuq l-opportunitajiet ta’ dawk li ssaportew il-kanċer biex jirritornaw għax-xogħol. F’kumpaniji b’inqas minn 250 ħaddiem, l-informazzjoni u l-għarfien dwar ir-riżorsi għal strateġiji jew programmi ta’ ritorn għax-xogħol huma partikolarment skarsi. Ir-ritorn għax-xogħol għal dawk li jaħdmu għal rashom u dawk li jaħdmu f’intrapriżi żgħar huwa saħansitra aktar problematiku.
X’jista’ jsir biex jiġi appoġġjat ir-ritorn għax-xogħol mis-superstiti tal-kanċer
Huma meħtieġa interventi effettivi biex jippermettu r-ritorn għax-xogħol. Ritorn għax-xogħol aktar amikevoli għall-impjegati bil-kanċer itejjeb il-benesseri ta’ dan il-grupp vulnerabbli u jnaqqas l-ispiża finanzjarja għall-ħaddiema, għal min iħaddem u għas-soċjetà.
Huwa ppruvat li interventi multidixxiplinari li jikkonċentraw fuq il-ħaddiem iżidu r-rati ta’ ritorn għax-xogħol, għalkemm sa ċertu punt biss. Dawn l-interventi jinkludu fiżjoterapija, terapija relatata max-xogħol, terapija tad-diskors, riabilitazzjoni vokazzjonali, edukazzjoni, konsulenza u taħriġ. Madankollu, ir-rapport imwettaq mill-EU-OSHA juri li ftit li xejn huwa magħruf dwar l-effettività tal-interventi ta’ ritorn għax-xogħol, inklużi dawk li jipprevedu adattamenti fuq il-post tax-xogħol.
Din hija r-raġuni għaliex il-pass li jmiss tal-EU-OSHA huwa li tkompli tesplora l-interventi eżistenti fuq il-post tax-xogħol u eżempji ta’ prattika tajba ta’ programmi ta’ ritorn għax-xogħol, kif ukoll l-esperjenzi tal-intrapriżi permezz ta’ studji ta’ każijiet ta’ kumpaniji. Se tiġi ppubblikata aktar informazzjoni dwar strumenti, interventi, programmi u prattiki ta’ suċċess u rakkomandazzjonijiet meħuda minn esperjenzi prattiċi. L-għan aħħari huwa li jiġu pprovduti għażliet ta’ politika li jistgħu jiġu kkunsidrati minn dawk li jieħdu d-deċiżjonijiet sabiex jiżdied u jiġi appoġġjat ir-ritorn għax-xogħol tal-pazjenti bil-kanċer. L-EU-OSHA qed tħejji wkoll dokument qasir li huwa maħsub biex jiggwida lill-intrapriżi li jiffaċċjaw każ ta’ kanċer fost il-ħaddiema tagħhom.
